Smartfonlardan həddindən artıq istifadə müasir dövrdə psixi sağlamlığa təsir göstərən əsas amillərdən biri hesab olunur.
Mütəxəssislər bildirirlər ki, gündəlik ekran vaxtının azaldılması diqqətin cəmlənməsinə, yuxu keyfiyyətinin yaxşılaşmasına və stress səviyyəsinin aşağı düşməsinə kömək edə bilər.
Onların tövsiyəsinə görə, telefondan asılılığı azaltmaq üçün ilk növbədə səhər oyandıqdan sonra ilk 30 dəqiqə ərzində telefondan istifadə edilməməlidir. Digər vacib addım sosial şəbəkələr və digər vacib olmayan tətbiqlərin bildirişlərini söndürməkdir. Bu, gün ərzində diqqətin tez-tez yayınmasının qarşısını alır.
Mütəxəssislər həmçinin yataq otağında telefon, planşet və digər rəqəmsal cihazlardan istifadə etməməyi tövsiyə edirlər. Araşdırmalar göstərir ki, yatmazdan əvvəl ekran qarşısında keçirilən vaxtın azaldılması yuxunun keyfiyyətinə müsbət təsir göstərir və orqanizmin daha yaxşı istirahət etməsinə kömək edir.
Mənbə: WorldNews