Bugun.tv xəbər verir ki, mütəxəssislər yaşıl və qara zeytunun fərqli ağac və ya müxtəlif növ olmadığını, hər ikisinin eyni zeytun ağacının meyvəsi olduğunu bildiriblər.
Onların sözlərinə görə, yaşıl zeytun tam yetişməmiş halda yığılır. Bu səbəbdən daha bərk, xırtıldayan və bir qədər acı dada malik olur. Meyvə yetişdikcə rəngi qırmızımtıl, bənövşəyi, qəhvəyi və ya tünd qara çalara çevrilir.
Araşdırmada qeyd olunur ki, satışda olan bütün qara zeytunlar təbii şəkildə yetişmir. Bəzi yaşıl zeytunlar xüsusi emal prosesindən keçirilərək oksidləşdirilir və nəticədə bərabər qara rəng alır. Bu məhsulların tərkibində rəngin sabitləşdirilməsi üçün E579 və ya E585 qida əlavələri göstərilə bilər. Mütəxəssislər bildirirlər ki, bu üsul düzgün tətbiq edildikdə sağlamlıq üçün təhlükəli hesab olunmur.
Zeytun təzə halda çox acı olduğuna görə birbaşa ağacdan yeyilmir. Acılığın aradan qaldırılması üçün meyvələr duzlu suda saxlanılır, fermentasiya edilir və ya digər emal üsullarından keçirilir.
Mütəxəssislər həm yaşıl, həm də qara zeytunun sağlam qidalanmanın bir hissəsi ola biləcəyini bildirirlər. Onların tərkibində olein turşusu, E vitamini, dəmir, kalsium və antioksidantlar mövcuddur. Lakin konservləşdirilmiş zeytunlarda duzun miqdarı yüksək ola bildiyindən, xüsusilə yüksək təzyiq və böyrək xəstəliklərindən əziyyət çəkən şəxslərə normaya riayət etmək tövsiyə olunur.
Sağlam böyüklər üçün gündə təxminən 7–10 ədəd zeytun (30–40 qram) qəbul edilməsi kifayət hesab olunur.
Mənbə: Health Mail.ru