Çimərlik mövsümünə hazırlıqla əlaqədar Respublika Gigiyena və Epidemiologiya Mərkəzi, Ekologiya və Təbii Sərvətlər Nazirliyinin Xəzər İnteqrasiya edilmiş Ekoloji Monitorinq (KTMM) Departamenti Bakı və Sumqayıt çimərliklərində monitorinq keçirib.
Bugün.tv bildirir ki, monitorinqlərin nəticələrinə əsasən, Mərdəkan, Şüvəlan, Novxana, Buzovna, Zaqulba, Nardaran çimərliklərində suyun fiziki-kimyəvi və bakterioloji göstəriciləri normaldır.
Şıxovo (Səbail rayonu) və Sahil (Qaradağ rayonu) çimərliklərinin sanitar mühafizə zonalarında dənizin kanalizasiya suları ilə intensiv çirklənməsi halları hələ də davam etdiyindən bu çimərliklərin sularında mikrobioloji çirklənmə göstəriciləri normadan artıqdır.
Həmçinin Hövsan (Suraxanı rayonu) və Türkan (Xəzər rayonu) çimərliklərində su mikrobioloji çirklənmə göstəricilərinin tələblərinə cavab vermir.
Respublika Gigiyena və Epidemiologiya Mərkəzinin Şıxovo, Sahil çimərlikləri, Hövsan, Türkan, Pirşağı çimərlikləri və Sumqayıt şəhər çimərliklərinin ərazisində qeyri-qanuni çimərlik zonalarının çimərlik kimi istifadəsinə müvəqqəti qadağa qoyulması ilə bağlı müvafiq qərarları qüvvədə qalır.