Azərbaycan müdafiə nazirinin tapşırığı ilə Şəxsi Heyət Baş İdarəsinin İdeoloji iş və mənəvi-psixoloji təminat şöbəsinin zabit və dövlət qulluqçuları silahlı qüvvələrdə, xüsusilə işğaldan azad edilmiş rayonlarda yerləşən hərbi hissələrdə xidmət edən hərbi qulluqçularla görüşlər keçirib. . Müdafiə Nazirliyindən verilən məlumata görə, yeni təlim dövrünün başlanması ilə əlaqədar görüşlərdə hərbi qulluqçuların xidmət və məişət şəraiti öyrənilib, onları maraqlandıran suallar cavablandırılıb, onlara hərbi xidmətlə bağlı lazımi tövsiyələr verilib.
Bundan əlavə, İdeoloji iş və mənəvi-psixoloji təminat şöbəsinin psixoloqları tərəfindən kadrların milli-mənəvi dəyərlərə sədaqət, dövlətçilik və vətənpərvərlik ruhunda tərbiyə olunması ilə bağlı maarifləndirici söhbətlər aparılıb.
Hərbçilər dövlət rəhbərliyinin diqqət və qayğısını, bunun nəticəsində onların mənəvi-psixoloji durumunun yüksək səviyyədə olduğunu qeyd ediblər. Onlar da yeni tədris dövründə qarşıya qoyulan məqsədlərə çatacaqlarına əminliklərini bildiriblər.
